رسالة من والد يوسف من دمنهور البحيرة
يوسف كان راكب عجله وفيه تكتوك خبطه من أكتر من شهرين ، يوسف وقع على أيده اليمين فالعضمة طلعت من أيده زي ما في الصورة وحصله كسر في الأمشطة الأربعة لليد اليمنى والدكاتره قالوا يوسف محتاج عمليات جراحية فورا ،
اتعرضنا علي اللجنه في مستشفي جمال عبد الناصر اللجنة حولتنا على الدكتور أحمد سميه إستشاري جراحة اليد فى مستشفي الناريمان ، ولما روحنا نتعرض عليه مكنش موجود هناك واتعرضنا على دكاتره غيره واعطونا ورقه بالعملية وقالوا روحوا بيها مستشفى الطلبة تاني وحاتتعمل هناك اخدنا الورقة وتاني يوم روحنا الطلبة على اساس يتعرض على رئيس القسم في الطلبة وتتعمل العمليه قالوا لا العملية تتعمل في الناريمان إرجعوا تاني الناريمان علشان تتعرضوا على د. احمد سميه ومش عارفين حانلاقوه ولا لأ
احنا دايخين من مستشفى لمستشفى ولسه ماخدوش القرار في العملية والولد عنده سكر وكان لازم تتعمل من زمان والتأخير غلط على حالته ،
كلمني والد يوسف وقمت على الفور بالتواصل مباشرة مع الدكتور أحمد مصطفى رئيس هيئة التأمين الصحي الذي قام بتكليف الأستاذ محمد فتحي مدير العلاقات العامة والإعلام بالهيئة بمتابعة الحالة ،
اللي أكد أن المدعو الدكتور احمد سمية متعاقد مع التأمين الصحي لكن مش بيروح المستشفى التابعة للتأمين الصحي وبرغم ان مفيش إستشاري غيره لكن سيادته مش فاضي للتأمين الصحي ،
اقترحت على والد الطفل يروح ” لسمية ” في عيادته الخاصة قال بالحجز لشهور ، عملت اتصال وتمكنا من الحجز السريع قابلهم أسوء مقابلة وقال مش هروح مستشفى التأمين والعملية هنا في عيادتي الخاصة هتتكلف 50 ألف جنيه ،
يوسف وأبوه تايهين بين المستشفيات من أكتر من شهرين وأصبحت كف الولد متعفنة ومعرضة للبتر ،
طيب فين الرحمة ؟ أو فين الرجولة يا سمية ؟؟
