بقلم نشوى سلامة
جُبران الخاطر موش حرام ولا عيب ولا هيقلل منك وتحس انك فى خانة العطاء بلا حدود ، محدش هيقول عليك طيب بهبل، ولو اتقال موش مهم، الطيبة عمرها ماكانت هبل طالما اللى قصادك بيقدرها
فلو تعرف تجبر بخاطر حد لا تتردد
يمكن جبرك ده يصلح كسر جواه ، يمكن
جبرك ده يحول حياته ويفتح الدنيا فى وشه.
يمكن جبرك ده يكون الامل اللى بيتعلق بيه ومستنيه. كل شىء ممكن المهم اعمل كده بضمير نقى يخلو من العائد
وتأكد كل كلمة بتقولها بيحفظها عنك وبيرجع يقولها لنفسه علشان يُجبر بخاطر نفسه ،
فلما تلاقيه بيردد كلامك اللى كنت بتقوله له كنوع من الدعم والتعزيز بدون ما يشعر وهو معاك وقصادك وكله قناعه كده وواثق من نفسه وهو بيتكلم ، وسعيد ان ده كلام طالع من جواه موش هقولك يمكن ، لكن هقولك مبروك انت ساعدته فعلا ووقفته من تانى يبص لنفسه ويفهم ويعرف انها بداية موش نهاية
انت سندته من غير ما يطلب، انت مخليتوش يشعر بضعفه ولاقلة حيلته ، انت عملت حاجة كويسه ، انت جبرت بخاطره ، انت ساعدته فعلا، ولا تنتظر شيئا، اياك ان تنتظر الرد، اياك ان تسترد دينك عنده،
و حتى لو كانت قسمتك مع الشخص ده هى الاساءة ونصيبك منه الألم
لكن زى ماجبرت غيرك ، هتلاقى اللى بيجبر كسرك انت كمان ، وكله سلف ودين
فتأخير الديون هنا نعمة وفضل ، وانتظر فقط الديان بما يحفظه لك عنده
